پنځه تباه کوونکي عادتونه
لیکنه ـ ریاض مقامزی
که دا عادتونه لرئ، همدا نن ترې لاس واخلئ؛ که نه ډېرې بدې پایلې به وګورئ.
• خلک به څه ووایي؟
که تاسو هم تل خپل پلانونه له دې امله نه عملي کوئ، چې خلک به څه ووایي؛ نو ډېر ژر به له ناکامیو سره مخ شئ. موږ ته د ژوند کولو یو چانس راکړل شوی. که په دې کې هم زړه نا زړه شو ناکامېږو. دا مه هېروئ چې خلک هېڅکله له خبرو لاس نه اخلي. که هر څومره ښه/بد شئ خلک مو نه پرېږدي؛ نو د خلکو پر ځای د خپل وجدان او انسانیت تابع شئ او د همدې دوو واورئ.
• وخت ضایع کوئ!
که تاسو هم په ډېرو لوبو، ټوکو ټکالو، انټرنیټ او نورو بې معنا کارونو خپل وخت ضایع کوئ، نو ډېر ژر به د ناکامۍ اعلان واورئ. زموږ توصيه دا ده، چې وخت ته تر هر څه ډېر ارزښت ورکړئ او سمه استفاده ترې وکړئ.
• په بې معنا کارونو پیسې مصرفوئ!
که د خپلو پیسو په اړه بې غوره یئ او بېځايه یې مصرفوئ، په حقیقت کې د خپلې تباهۍ لپاره کنده جوړوئ. دا په دې معنا نه ده، چې تاسو دې له شتمنیو سره مینه وکړئ؛ خو پدې معنا حتما ده، چې پیسې بې ځایه مه مصرفوئ ترڅو په سختو شرایطو کې ترې ګټه واخلئ.
• اقدام نه کوئ!
تاسو به هم لیدلي وي، ځینې خلک فقط او فقط خبرې کوي. پلانونه جوړوي او هيلي لري؛ خو ددې ټولو د ترلاسه کولو لپاره هېڅ عملي اقدام نه کوي. دا ډله خلک فقط او فقط ناکامي ویني. ځکه چې نتیجه په خبرو نه ترلاسه کېږي. هر هدف کار، زحمت او خواري غواړي. نو عملاً اقدام کوئ او نتیجه ووينئ.
• تمه کوئ!
له ملګرو، خپلوانو او آن کورنۍ تمه کول تاسو تباهۍ ته بیايي. په دې معنا چې تاسو به د بې ځایه تمې له کبله خپله زحمت نه وباسئ او په دې توګه به د لټۍ پر بلا واوړوئ او د کار کولو ځواک/انرژي به له لاسه ورکړئ. نو زموږ لارښوونه دا ده، چې هېڅکله له نورو تمه مه کوئ. یوازې او یوازې پر خپل زحمت او توکل باور ولرئ.