To start downloading books

Please sign in or create an account.

Waheed Zaheer 3 years ago 2,051
د هڅوونکي سهار پیل

د هڅوونکي سهار پیل

لیکوال : وحید زهیر

خوښي او بریالتیوب د هر چا حق دی. هر انسان ارام او ښکلی ژوند خوښوي، خو ټول ښکلی ژوند نه لري. ځينې خلک پیدایشي بختور وي. چېرې باعلمه، نېک نامه او سرمایه داره کورنۍ/ټولنه کې پیدا شي، د ژوند امکانات ورته تیار وي. که یو څه بادرکه وي، مخکې چې ښو بنسټونو کې تعلیم او تحصیل وکړي نو ژر د ښه ژوند خاوند شي خو هر چا لپاره دا مزل دومره اسان نه دی. د ښه ژوند لپاره خواري کول او ښه عادتونه پالل مهم دي. هر ځای کې سهار خلک بېلابېل عادتونه لري خو د ډیرو بریالیو خلکو د سهار ځينې عادتونه ګډ دي. له دې ښکاري چې سهار ځانګړی قوت لري او باید سم پام ورته وشي.

ځينې ښه عادتونو په لاندې ډول دي:

۱- د خوب ځای مو سم او بستره ټوله کړئ!

ډیربریالي خلک وايي که له خپل تنبل حالت سره مخه ښه غواړی، سهار کې مو د بسترې او خوب ځای سمول زده کړئ. اصلاً د دې تر شا یو ارواپوهنیز علت هم شته، ځکه خو عسکرۍ کې هم مراعتیږي. د بسترې سمول د نظم او ډسپلین سره اړیکه لري، کله چې دا کار وکړئ نو ذهن ته مو اتومات یو پیغام ځي چې د ورځې لومړی کار مو سم بشپړ کړ، د ورځې پاتې کارونو ته هم هڅول کيږی. دا عادت په تاسې غیرشعوري ډیر ښه اغیز کوي.

۲- عبادت او مراقبت وکړئ!

رب سره مینه او اړیکه د انسان قوت او ډاډ دی. رب ته سجده، راز و نیاز سره ښه احساس کوی او دې سره ستاسې په زړه کې د ښو کارونو نیت پیدا شي.

اکثر خلکو ته لسو دقیقو لپاره مراقبت او ذهني ارامي سخته وی، خو ژوره ساه اخیستل ټولو ته اسانه ده. سهار لسو دقیقو لپاره په تازه هوا او ارام ځای کې ژوره ساه واخلئ. دا کافي ګټې لري مثلاً سکون او ارامښت احساسوی، فوکس مو ډیريږي او انرژئ اخلی. د ژورې ساه تمرین تاسې له انټرنیټ ښه زده کولی شی.

۳- په نهاره اوبه وڅښئ!

 د انسان مغز له ۷۰٪ اوبو جوړ دی. که موږ سهار او یا د ورځې پر مهال کافي اوبو څښو نو دا انرژي راکوي. کله چې موږ له شپې تر سهاره مسلسل څو ساعته خوب کوو، نو بدن او د مغز حجرې مو د اوبو د کمښت (Dehydration) حالت ته ځي. د هارورډ طبي پوهنتون څېړنه ښيي له همدې امله ډیرکله انسان سهار کې ستړی، تنبل او سردرد احساس کوي. ښه ده چې سهار په نهاره یو یا دوه ګیلاسه اوبه وڅښئ، که جوش اوبه وي لا ښه ده. دې سره ستاسې بدن کې میتابولیزم چټک کيږي.

۴- ښه مطالب وګورئ!

کتاب، یو ښه مطلب، مقاله یا شعر ولولئ/واورئ چې موډ مو درته برابر کړي. ضرور نه ده چې یو ساعت پرې تېر کړئ، که خوښ یاست سمه ده ګنې لس دقیقې هم کافي دي. ځينې خلک پر ټولنیزو رسنیو له ښو مطالبو سکرین شاټونه اخلي او دې ته ځانګړی فولډر لري. ځينې ښایسته حکایتونو او ټوکې په کتابچه کې ليکي. ځينې موبایل یا کمپیوټر کې د ګټورو ویډیوګانو فولډرې لري. په ښارونو کې د خلکو کورو ته سهار وخته اخبارونه رسيږي. که تیز او ارزانه نېټ لری نو دې ټولو موادو لپاره ځانګړي او ښه سایټونه شته، هروخت ورته لاسرسی موندلی شی خو که انټرنېټ نه لری خپل ارشيف جوړ کړئ او په مهمو وختونو کې ترې ګټه واخلئ.

۵- فزیکي ورزش وکړئ!

که ټوله ورځ تنبل اوسی، د ورځې پیل کې ډیر لږ تمرین، منډه او یا قدم ستاسې دا ستونزه کمولی شي. د ورځې به فعال اوسی. د وینې جریان مو ښه او مغزو ته مو اکسیجن رسيږي.

۶- په یخو اوبو ځان ووینځئ!

که هوا سړه نه وي، سهار کې په یخو اوبو لامبل له تاسې تنبلي تختوي، پوره فعاليږی او انرژي مو ډیريږي. دا کار په نړیواله توګه خلک ګټور ګني. یخو اوبو سره بدن کې د سپین کرویاتو شمېر ډیريږي او دا سپين کرویات موږ له ناروغیو ساتي. ډیر خلک د فعاله پاتې کېدو او بدني انرژی لپاره دا کوي.

۷- د ورځې پلان وليکئ!

که هره ورځ د خپلې خوښې سره سمه غواړئ، نو پلان مهم دی. پلان باید زموږ د هرې ورځ عادت شي. د ورځې پلان سهار وليکئ. دې سره مو کارونه نه هیريږي او ټولو کارونو ته یو ترتیب او نظم ټاکی. د موبایل پرځای پلان په یوې جیبې کتابچه یا یو کاغذ ولیکئ. موبایل ستاسې فوکس خرابوی شي خو په کاغذ لیکلی پلان سره مزاحمت نه شي. کله چې مو کار وکړ، پر کاغذ همغه کار ته مخکې یو ټېک مارک وکړئ دا تاسې ته ډاډ درکوي او لا نور هڅيږی. 

خوښي او بریالیتوب په یو ورځ یا سهار نه ترلاسه کيږي. تاسې باید مسلسل او زنځيري ښه مخ ته لاړ شئ. ممکن یو-نیم سهار تاسې دا عادتونه پوره نه کړئ، څه خبره نه ده خو د سهار فکر ، پلان او اراده باید تل ولری.

Related Articles

څنګه پوه شو، چې يو کس مونږ سره کينه لري؟

ژباړه: قدر ت الله حبيب کله کله انسان نه پوهيږي چې خلک دوې سره ولې خرابه رويه کوي،  کله چې انسان، بريا ته ورسيږي ، مشهور شي ، په مالي لحاظ لوړ شي، خوشاله وی، د ډاډمن  ژوند تيروي، کله کله حسد ددې له امله هم وي چې خلک ولې مينه تاسې سره لري.داسې وخت کې به دې ځينې خلک ستاينه کوي، او ځينې به درسره کينه پيدا کوي. په حقيقت کې حسد د انسان داسې احساس دی چې...

د اولاد تربیه او کورنی چاپېریال

زمونږ په ټولنه کې زیات مور و پلار په لوی لاس خپل اولاد د بې لارېتوب لوري ته کشوي، هغوی خپل اولاد ته خبرې د پېغور په ډول کوي. د مثال په ډول که کوم بچی یې له کوم تکړه ډاکتر څخه متاثره شوی وي او د پلار یا مور پر وړاندې ووایي چې که لوی شم زه به هم ډاکتر یا انجینر جوړېږم؛ نو پلار یې په طنزيه او قهرېدلې ژبه ورته وايي، ((مردار خوره، ته دې شکل وګوره، ستا ش...

دیرش ارزښتمن نصیحتونه

 ۱_ ورځ مو دسهار په لمانځه،او داللهﷻ په ذکر پېل کړئ بریالیتوبونه به مو قدمونه ښکل کړي. ۲_ همېشه کوښښ وکړئ چې استغفار ډېر ولولئ، ځکه دغه کار مو شیطان دځان وژنې تر بریده ناهیلې کولای شې. ۳_ هیڅکله دعا مه پریږدئ ،ځکه دعا دژغورنې رسۍ ده. ۴_ تل په یاد لره چې فرشتې دي خبرې لیکي ،نو داسې څه مو وایه چي ورسته پرې پښېمانه شې. ۵_ تل خوشبین اوسه، که څه هم...

Recommended Articles

د نارينه د جنسيت د هورمون د کمېدو سببونه

هورمونونه په بدن کې ورو ورو خو ژور او دومداره اغېز لرونکي کيمياوي مواد دي، هورمونونه ورو ورو تاثیر پيلوي خو دا تاثيرات یې بیا د ډېر وخت لپاره دوام کوي، هورمون د کاربون هيدرات او شکرو غوندې نه دي چې يو کس ته لس دقيقې غښتلې انرژي ورکړي لس دقيقې وروسته بيا بېرته خپل ټول تاثير له لاسه ورکړي، د هورمونونو تاثير د زيات وخت لپاره دوام کوي. د انسان په بدن...

څنګه کولای شو ښه شخصيت ولرو؟

 په دې لیکنه کې به تاسو هغه لارښوونې ولولئ، چې تاسو ځانګړي کوي او خلک به مو شخصيت ته درناوی لري.   خپل ظاهر ته ارزښت ورکړئ د هرې اړیکې په شروع کې ظاهري شکل خورا اړین فکټور ګڼل کېږي. په هاروارډ پوهنتون کې ترسره شوې څېړنه ښيي، چې انسانان ظاهر ته په کتو په لومړۍ ليدنه کې د مقابل لوري په اړه له ۳ نه تر ۷ ثانيو پورې  قضاوت کوي.  ددې لپاره چې ځانګړي و ا...

خېټه څنګه کوچنۍ کړو؟

د نارینه او نجونو لپاره تر ټولو بد مرض د خېټې د وازدو ډېرېدل او غټېدل دي چې نه یې یوازې ښکلا ته زیان رسوي، بلکې صحت ته یې هم ستونزې جوړوي. نن درته د خېټې د کوچني کولو داسې طریقې در ښیوو چې د ډېر ورزش ستړیا به هم نه ورسره ګالۍ او په تکلیف به هم ورسره نه شئ. د ورځې پیل د لیمو په جوسو وکړئ، نیم لیمو په یو ګیلاس اوبو کې زبېښل او څښل یې په حجراتو کې...