په محصلینو کې د ځان د اعتماد، باور، د ځان ارزښت احساسات او انګیزې سمینار

دغه سمینار د محصلینو په ژوند کې د ځان د اعتماد، باور، د ځان د ارزښت احساس او انګیزې رول او اهمیت څېړي. د سمینار موخه دا ده، چې محصلین وپوهېږي چې د ځان په اړه مثبت فکر، ځان ته ارزښت ورکول او د لاسته راوړنو لپاره انګیزه درلودل د هغوی په تحصیلي او شخصي پرمختګ کې بنسټیز اهمیت لري. په پیل کې د ځان اعتماد تعریف او د هغه د جوړېدو لارې بیان شوې. ځان اعتماد هغه باور دی چې انسان د خپلو وړتیاوو، مهارتونو او پرېکړو په اړه لري. وروسته د باور او د ځان د ارزښت احساس تر منځ اړیکه تشریح شوې، چې څرنګه یو محصل د خپل شخصیت او وړتیا ارزښت درک کوي او دا احساس یې له نورو سره د تعامل په څرنګوالي اغېز کوي. د انګیزې برخه کې بحث شوی چې څنګه مثبت فکر، هدف ټاکنه او د لاسته راوړنو ستاینه د محصل د دوامدار پرمختګ سبب ګرځي. سمینار دا هم څرګندوي چې د ځان باور او انګیزه یو سره تړلي دي؛ هر څومره چې د محصل ځان باور قوي وي، هغومره یې د زده کړو انګیزه او هڅونه ډېره وي. په پای کې سپارښتنه شوې چې ښوونکي، والدین او خپله محصلین باید هڅه وکړي چې مثبت ذهني فضا رامنځته کړي، په ځان اعتماد او باور ولري، خپلې وړتیاوې وپېژني او د خپلو اهدافو د ترلاسه کولو لپاره دوامداره هڅه وکړي.