په روژه میاشت کې انسان له ځینو روغتیایي ستونزو لکه؛ کم خوبي، ډیهایډرېشن، سردرد او… نورو سره مخ کیږي چې سبب یې نا سالمه خوراک او د خوړلو پر وخت بې پروایي ده، دلته د سالمې روژې لپاره ځینې لارښوونې دي:
۱: پیشلمي ( سحري) ضرور وخورئ!
څنګه چې وایي : “سهارنۍ د ورځې تر ټولو مهم خواړه دي” په روژه کې یې پیشلمی ځای نیسي او باید پیشلمي ته را ویښ شئ او په کافي اندازه صحي خواړه وخورئ. ډېری کسان په نهاره روژه نیسي او وایي چې: “ خوب راځي” دایو عادي خبره ده چې په روژه کې د خوب توازن ګډوډیږي خو که په نهاره مو روژه ونیوله د نورو روغتیایي زیانونو ترڅنک د روژه مات (افطار) پر وخت د ډیر خوراک لامل کیږي چې هغه ډېر خوراک د ناسالمه وزن لوړیدو سبب کیږي.
۲: د روژه مات (افطار) پر وخت ډېر خوراک مه کوئ
لکه څنګه چې د پیشلمي پر وخت د خوړولو توصیه کیږي برعکس یې باید د روژه مات پر وخت ډېر خوراک ونشي ځکه د روژه مات پر وخت ډېر خوراک بدن ته زیان رسولی شي.
د روژه مات خواړه باید متوازن او مغذي وي. نه یوازې ډېر خوراک بلکه د روژه مات پر وخت باید ډېر غوړ خواړه هم ونه خوړل شي ځکه دا دې بدهضمۍ او د وزن د زیاتېدو سبب کیږي، دلته باید دې خبرې ته د عمل جامه ور واغوستل شي چې “ کم وخورئ، تل وخورئ” نو د روژه مات او بیا پیشلمي تر منځ یوه اوږده زماني فاصله شتون لري چې تاسوکولای شئ د خوړلو او څښلو لپاره ترې ګټه واخلئ.
۳: د ډیرو غوړو، سره شوو، مالګینو او خواږو خوړلو څخه ډډه وکړئ
له دا ډول خواړو یو دود جوړ شوی او عامه خبره ده چې ډیر خواږه او غوړ د ژر مړیدو سبب کیږي خو دا ستاسو لپاره د راتلونکې ورځې روژه ستونزمنه کوي.
له ناسالمه وزن زیاتیدو ور ها خوا ډېر غوړ او خواږه خواړه د سستۍ او ستړتیا سبب کیږي او باید د مالګینو خواړو په خوړلو کې احتیاط وشي او د پیشلمي پر وخت مالګین خواړه تر ډیره حده کم کړئ ځکه دا د ورځې د تندې سبب کیږي.
د دا ډول خواړو ځای بدل کړئ پر ځای یې سبزیجات او میوه وخورئ، او داسې خواړه وخورئ چې په زیاته کچه فایبر ولري، ځکه د پیشلمي پر وخت د فایبر لرونکو خواړو خوړل مو تر ډیره موړ ساتي.
۴: تر ډیره حده اوبه وڅښئ
د روژه مات او پیشلمي تر منځ د امکان تر حده د اوبو څښل د روژې په جریان کې د ډیهایډرېشن خطر کموي.
هره ورځ د روژه مات او پیشلمي تر منځ لږ تر لږه ۸ ګیلاسه مایعات وڅښئ. په مایعاتو کې جوس، شیدې، مشروبات او سوپ شامل دي، مګر اوبه یوه غوره ټاکنه ده.