لاځوابه پوښتنې
لاځوابه پوښتنې هغه ډول پوښتنې دي، چې د ځان ارزونې او ځان پوهونې په موخه له موږ سره ترټولو زیاته مرسته کوي، دا پوښتنې کومه هوايي او تیوریکي بڼه نه لري، بلکې ددې پوښتنو هرځواب، هر لوستونکی د عمل ډګر ته بیایي، هلته يې خپل ځان او حالت ته په دقیق ډول متوجه کوي او په دې سره يې د خپل ځان د جسمي او رواني تحليل انګېزې لا پیاوړې کوي.
نو له دې مخې دا هره پوښتنه چې دلته راوړل شوې، هېچا ته يې ځواب مه وایئ او مه يې په خپلو کلیدي خواصو خبروئ، په يوازې توګه د خپل زړه او تجربو دروازې پرې راپرانيزئ او بیا ورته د زړه له تله صادقانه ځوابونه ووایئ.
◀ که چېرې يې ستا له ژوند څخه کوم فلم جوړولی او هغه یې بیا تاته په نمایش کې اېښودلی، آیا د ځینو صحنو په لیدو نه خجالت کېدلې؟ که خجالت کېدلې، نو ولې خجالت کېدلې؟
◀که چیرې ستا د مرګ حالت رارسېدلی وي او د یوه تلفون کولو فرصت ولرې، نو چاته دې تلفون کاوه؟ او څه دې ورته ويل؟
◀تر اوسه دې څوځله خپل نفس ته ویلي نه؟
◀تر اوسه دې څو کسان له هغو کسانو څخه بښلي، چې له تاسره يې بدي کړې ده؟
◀ستا په ژوند کې تر ټولو غوره پېښه کومه يوه وه؟ او هغه څنګه وه؟
◀که همدا اوس غواړې د چا په حال وژاړې، هغه به څوک وي؟ او ولې به پرې ژاړې؟
◀ترټولو وروستنی کار چې تاد خدای لپاره کړی دی هغه کوم دی؟
◀تر اوسه دې څوځله ګناه کړې؟ ولې؟ آیا پښېمانه يې؟
◀ آیا خپل ځان خوشاله بولې، که غمجن؟
◀تر اوسه دې څو ځله نور خلک تحقیر کړي دي؟ او ولې دې تحقیر کړي دي؟
◀ که چېرې همدا اوس د خدای (ج) حضور ته ورسېږې او هغه ستا د ژوند د حاصل پوښتنه وکړي، څه به ورته وايې؟
◀ د خپلې روحيې د اوچتولو لپاره د خپل ځان په اړه څه ډول فکر کوې؟
◀ په خپل ژوند کې د څه شي په اړه زیات افتخار کوې؟
◀ کوم لوی امتیاز چې ته يې په ژوند کې لرې، هغه کوم دی؟
◀ په کوم کار کې په خپل ځان باندې تر ټولو زیات اعتماد لرې؟ او څه ډول دا اعتماد څرګندولی شې؟
◀ تاسو د خپل ځان په کوم غړي باندې دغرور احساس کوئ؟ او ولې یې کوئ؟
◀ تاسو د خپل ځان په کوم غړي باندې خجالت وباسئ؟ او څنګه يې وباسي؟
◀ له چاسره علاقه لرې؟ او ولې یې ورسره لرې؟
◀ ستا په ژوند کې تر ټولو لویه پېښه کومه يوه وه؟
◀ له خپل ژوند څخه مو چې تر اوسه کوم لوی درس اخیستی، هغه کوم دی؟
◀ آیا داسې غوره څه لرې، چې نورو ته یې ډالۍ کړې؟
څنګه کولی شې، چې نور خلک په خپلو فعالیتونو کې را شریک کړې؟
◀ څنګه کولی شې، چې په سختو شرایطو کې خپل زړه ورتوب څرګند کړې؟
◀ آیا تراوسه دې په خپل ځان پورې خندلي دي؟ که دې خندلي وي، نو ولې دې خندل؟
◀ آیا خپل ځان یوساده فكره سړی بولې که څنګه؟
◀په وروستي ځل دې که له کوم دوست سره په ناڅاپي ډول رابطه قطعه کړې وي، هغه څوک و؟ او ولې دې ورسره رابطه قطعه کوله؟
◀ستا په نظر د خدای (ج) تر ټولو مهم پیغام ستا لپاره څه دی؟
◀څه فکر کوې، ستاد تفکر د بدلون تر ټولو غوره لارکومه یوه ده؟
◀ آیا سګرټ څکوې؟ که يې څکوې، نو ولې دا کار کوې؟
◀ ستا په نظر د کامیابی بهترینه لارکومه يوه ده؟
◀ په همدا اوس حال کې کوم مهم عوامل تا ترټولونه زیات په شور و هیجان کې راولي؟
◀ ترټولو ارزښتناک احساسات چې همدا اوس يې لرې، هغه کوم دي؟
▶ مخکې له مخکې باید کوم کار ترسره کړې، چې ستا د کورنۍ او خپلوانو د افتخار سبب شي؟
◀ څنګه کولی شې خپله علاقه او لېوالتيا د نورو په وړاندې ثابته کړې؟
◀ د خپل شخصیت له کومې جنبې سره دې مینه لرې؟
◀ که چېرې د خپل ژوند مسئولیت په غاړه واخلې، نو څه ډول تغیرات په خپل ژوند کې پیش بیني کولی شې؟
◀ په وړکوالي او ځواني کې دې له مشرانو او تجربه کارو خلکو څخه کوم ډول نصيحتونه اورېدلي، چې ستا په ژوند کې یې مثبت تاثیرات درلودلي دي؟
◀ کله چې خپلو تېرو کلونو ته فکر کوې، کوم کارونه دې په هغو کې ډېر جدي نیولي وو، او په کومو کارونو کې نتیجې ته رسېدلی وې، چې همدا اوس هم ستاد افتخار سبب دي؟
◀ آیا تر اوسه د دخپل ځانه بد راغلي؟
◀ ځان پېژندنه څه ته وایي؟ او تا تر کومه بریده خپل ځان پېژندلی دی؟
◀ آیا فکر کوې چې د څومره خلکو بد اېسې او دلیل یې څه دی؟
◀ ستا کوم عمل که په یو مجلس کې یاد شي خوشهاله کېږې؟